Коммуналчыларга ярдәмгә компьютер килде

Асия Мөхәммәтханова

17 март - халыкка көнкүреш хезмәте күрсәтү һәм торак-коммуналь хуҗалыгы хезмәткәрләре көне.

"Нептун" идарәче компаниясе карамагында - торак фонды. Компания хезмәткәрләре подряд оешмалары һәм халыкның арадашчысы буларак, торак йортларда яшәүчеләр белән килешү төзи һәм, халык гозерләрен дә искә алып, агымдагы елда хәл ителәсе мәсьәләләрне гамәлгә ашыруны контрольдә тота.

"Нептун" идарәче компаниясе директоры Алмаз Искаков белдерүенчә, торак йортларда капиталь һәм агымдагы ремонт эшләрен башкару өчен подряд оешмалары - "ЖилЭнергоСервис-Менделеевск" ҖЧҖ һәм "Л.Карпов ис. химзавод" ААҖ һ. б. лар белән килешү төзелгән.

- Ремонт эшләрен, беренче чиратта, авария хәлендәге торак йортларда ясау күздә тотыла. Агымдагы елда Чоловский урамының 14 нче, Химиклар урамының 10 нчы һәм Хезмәт урамының 8 нче йортларында капиталь ремонт мартта башланды. Бүгенге көндә Хезмәт урамының 8 нче йорты подвалында кызу эш кайный. Әлеге йорт төзелүгә аз вакыт үтсә дә, биредә капиталь ремонт үткәрелә. Халык шикаятьләре күп булу сәбәпле, сафтан чыккан кайнар һәм салкын су, җылылык белән тәэмин итү системалары, түбә яңартылачак. Шулай ук йортның нигезен ныгыту, фасадны төзекләндерү, канализацияне яңарту планлаштырыла, - ди Алмаз Фәритович.

"Л.Карпов ис. химзавод" ААҖ ремонт-төзелеш идарәсенең участок начальнигы Әлфия Шәңгәрәева әйтүенчә, йортның подвалы чүп-чардан арындырылып тәртипкә китерелгән һәм вак таш белән ком катнашмасы җәелгән, ут куелган.

Мастер Илдар Гыймазетдинов хезмәткәрләр белән беррәттән җиң сызганып эшли һәм башкарыласы вазифаларны күз уңаенда тота.

Химиклар урамының 4 нче йортында агымдагы ремонт бара. Аңа штукатур-буяучылар, түбә ябучылар һәм балта осталары - барлыгы җиде кеше җәлеп ителгән. 9 катлы йортның беренче подъездында агарту һәм буяу эшләре төгәлләнгән.

Химиклар урамының 6 нчы йорты подвалында "ЖилЭнергоСервис-Менделеевск" ҖЧҖ эшчәннәре хезмәт куялар. Бригадир Эльвир Кайбешов сүзләренчә, хәзер торак йорт подваллары элеккегегә караганда чиста һәм коры. Слесарьлар Ренат Гайсин һәм лаеклы ялда булуына карамастан эшләвен дәвам итүче Равил Сибгатуллин салкын һәм кайнар су, канализация торбаларын алыштыралар.

Тукай урамының 6 нчы йорты түбәсе кардан чистартыла. Монда түбә ябучылар Анатолий Колбин һәм Денис Окисов тырыш хезмәт куялар.

Авария-диспетчерлык хезмәте (Тукай урамы, 6 нчы йорт) тәүлек дәвамында эшли. 2-41-01 телефоны тынып тормый. Шәһәр һәм авыл халкының проблемалары җитәрлек: подъездда җылылык торбасы тишелгән, йорт түбәсеннән су ага, кемнеңдер фатирында су юк һ. б. лар. Диспетчер Мария Шәймөхәммәтова төгәлсезлекләр турында һәр хәбәрне үз вакытында слесарьларга җиткерә, алар тиешле чаралар күрәләр.

Мария ханым компьютер аша йортларда күпме микъдарда су кулланылуын, су басымын контрольдә тота. Вазифаларын төгәллек белән башкара.

Халык белән эшләү зур җаваплылык, сабырлык һәм тырышлык таләп итә. Әлеге һөнәр ияләренә сәламәтлек, уңышлар юлдаш булсын.

Эмма Панфилова фотолары