Кыш әле тәмамланмады

Гыйнвар салкыннары ике атнага сузылды. Бу чорның шәһәр службалары, предприятие һәм оешмалар эшчәнлегенә йогынтысы турында корреспондентыбыз Вәсилә Мортазина сорашып белеште.
Иң элек без Менделеевск җылылык челтәре начальнигы Илдус Җәләевка мөрәҗәгать иттек.
- Һава температурасы төшү җылылык белән тәэмин итүдә өзеклекләргә китермәде. Җәй көне башкарылган әзерлек эшләренең уңай йогынтысы сизелде. Котельныйлар район һәм шәһәрне өзлексез җылылык белән тәэмин итте. Җылылык чыганаклары штатлы режимда эшлиләр, җылылык пункты температурасы мондый һава температурасында тиешле нормаларга туры килә, - дип раслый Илдус Илһамович.
Торак йортларда да аварияләр булмады. "Нептун" ИК җитәкчесе урынбасары Валентина Смольникова сүзләренчә, шәһәрлеләрнең гаризалары агымдагы характерда булды, аларның саны нормадан артмады.
- Чүп чыгаруда да кыенлыклар тумады, - дип ышандыра "Экология" ҖЧҖ директоры Руслан Гришин. - Безнең дежур техника һәрвакыт бар, әгәр сафтан чыкса, салкында төрле хәл булырга мөмкин: шланглар шартлый, башка төзексезлекләр күзәтелә, Чаллыдан машина килә.
Мондый салкыннарга балалар гына шат булгандыр, чөнки табигать аларга өстәмә каникуллар бүләк итте.
- Температура 25 градустан түбән булганда, башлангыч звено өчен мәктәптә дәресләр булмый. Узган атнада укымадык диярлек. Мәгариф идарәсе салкын һава торышында әти-әниләрдән балаларның үзләрен генә мәктәпкә җибәрмәүләрен үтенә. Калган дәресләрне акрынлап куып җитәргә: өстәмә дәресләр үткәрергә, бер дәрестә ике тема үзләштерергә туры килер, - дип сөйли 1 нче мәктәпнең 3В сыйныфы җитәкчесе Марианна Кузнецова.
АТПнең эксплуатация инженеры Ирина Бородина аңлатуынча, 29 гыйнвардан 1 февральгә кадәр авыл мәктәпләрендә укулар булмады, шунлыктан укучыларны йөртүче автобуслар рейска чыкмады. Автотранспорт предприятиесе өчен 35 градуслы салкын чын имтихан булды. Кайбер автобуслар тиз генә кабынмады, аларны җылыту өчен өстәмә вакыт таләп ителде. Шәһәрара рейслар расписание буенча башкарылды, бер көн Казанга гына автобус бармады.
Шәһәр таксилары эшчәнлеге салкын көннәрдә бераз үзгәрде. Таксопаркларның берсендә хәбәр итүләренчә, соңгы ике атнада аларга ихтыяҗ артты, бәяләр үзгәрешсез калды. Гадәттә шәһәрлеләр эшкә, бакчага, больницага бару өчен такси чакырттылар.
- Соңгы көннәрдә чаңгы шуарга теләүчеләр юк диярлек, һава температурасы -180Стан түбән булганда, урамда озак йөрү тәкъдим ителми, - ди "Батыр" яшүсмерләр спорт мәктәбе директоры Ринат Фәттахов. - Ә җылы көннәрдә чаңгыда йөрергә теләүчеләр шактый, ял көннәрендә гаиләләр белән саф һавада йөреп керергә киләләр.
Салкыннарны шәһәр лаеклы үткәрде: бу чорда район территориясендә гадәттән тыш хәлләр теркәлмәде. Кыш башыннан артык туңган һәм өшегән алты пациент больницага мөрәҗәгать итте. Әмма уяулыкны югалтырга ярамый, диләр медиклар, кыш әлегә тәмамланмады.