Җәмгыять
Тормышы һәркемгә үрнәк
Фәймә Вахриева Сугыш һәм тыл ветераны Ираида Петровна Шишкина туганнары, якыннары янәшәсендә 90 яшьлек юбилеен билгеләп үтте. Район башлыгы урынбасары Рөстәм Хәбибуллин, Социаль яклау идарәсе начальнигы Әлфия Салаватуллина, үзәк хастаханәнең өлкән шәфкать туташы Рәзинә Никитина көн героена котлаулар җиткерделәр. Юбилярга тәрбрикләү сүзләре белән мөрәҗәгать итеп, Рөстәм Зиннурович шәһәр һәм район...
Фәймә Вахриева
Сугыш һәм тыл ветераны Ираида Петровна Шишкина туганнары, якыннары янәшәсендә 90 яшьлек юбилеен билгеләп үтте.
Район башлыгы урынбасары Рөстәм Хәбибуллин, Социаль яклау идарәсе начальнигы Әлфия Салаватуллина, үзәк хастаханәнең өлкән шәфкать туташы Рәзинә Никитина көн героена котлаулар җиткерделәр.
Юбилярга тәрбрикләү сүзләре белән мөрәҗәгать итеп, Рөстәм Зиннурович шәһәр һәм район башлыгы Игорь Привалов исеменнән бүләк тапшырды.
Ираида Петровнаның инде үзләре дә күптән пенсия яшендә булган балалары Олег Юрьевич һәм Вера Юрьевна әниләренең тормыш сөючәнлегенә, рухи ныклыгына сокланалар.
- Ул безне күңел төшенкелегеннән саклый, яшәргә көч бирә, зирәк киңәшләре белән булыша, - диләр.
Илле елга якын гомерен кеше сәламәтлеген кайгыртуга багышлаган И.Шишкинаның принциплары гади: шатланып яшәргә, мохтаҗларга ярдәм кулы сузарга, якыннары белән бердәм булырга.
Кировта медучилище тәмамлаган кыз сугыш елларында яраланган солдатларны аякка бастыруда тырыша. Ул чорда күргән кайгы, күз яше, үлем йөрәгендә әле дә сары сагыш булып саклана.
Озак еллар терапиядә өлкән шәфкать туташы вазифасын башкарган Ираида Петровна белән хезмәт куйган Нина Николаевна бергә эшләгән вакытларын сагынып сөйли.
- Язмыш мине чын ак халатлы фәрештә белән очраштырды. Һөнәрен ул Аллаһы Тәгалә кушуы буенча сайлагандыр. Андый сәләтле, хезмәтенең бар нечкәлекләрен тоеп, авыруларны бала тәрбияләгән кебек дәвалаган башка кешене мин белмим. Ветеран коллектив хезмәткәрләренә осталыгын тапшырып, ныклы тәртипле эш системасын төзеп калдырды, гомумән, өлкән иптәшләребез Наталья Абрамова, Евгения Хлюпина, Ангелина Стрижова, Валентина Куликоваларны әле дә зур хөрмәт белән искә алабыз, - ди ул.
И.Шишкина үзе дә коллективы турында җылы сүзләр генә әйтә.
- Ветераннарны онытмыйлар, һәр бәйрәмдә искә алалар, бүген дә сөендерделәр. Эшемне яратып башкардым, мөмкин булса, һаман да менделеевлыларны дәвалар идем, - дип елмая.
Унынчы дистәсен ваклаган ветеран улы Михаилны, тормыш иптәше Юрий Георгиевичны югалтуын авыр кичерә. Биш оныгы һәм биш оныкчыгы аңа яшәргә көч бирә, кайгыдан арындыра. Аларның уңышлары, матур тормышлары өчен горурлык кичерә.
Озын хезмәт гомере үткән юбиляр поселокта мөстәкыйль яши. Әле дә кул кушырып утырырга яратмый. Оекбашлар бәйли, газета укырга ярата, бигрәк тә хезмәттәшләре, хастаханә турындагы язмаларны.
- Әнинең хәтере яхшы, - ди улы Олег, очрашкач бала чакларны, гаиләбез тигез булган көннәрне искә алабыз. Безгә карата гадел, йомшак булды, кирәк чакта кырыслык та күрсәтә иде. Аның үрнәгендә җаваплы, эш сөючән булып тәрбияләндек. Балаларыбызны һәм оныкларыбызны да кешелекле, мәрхәмәтле, сәламәт тормыш рәвешен алып баручылар итеп күрәсе килә. Ә яшь йөрәкле әниебез өчен моннан да зур бүләкнең булуы мөмкин түгел.
Следите за самым важным и интересным в Telegram-каналеТатмедиа
Нет комментариев