Ижёвкалыларның өйләренә күптән көтелгән су килде

Моңарчы завод поселогы дип аталучы районда яшәүчеләр су белән "Шифалы су" заводы суүткәргеченең иске тармагыннан тәэмин ителделәр. 1 апрельдән, предприятиенең банкротлыгы белән, су бирүне туктату турында хәбәр килде. Проблеманы хәл итүгә барлык көчләр җәлеп ителде - килешү төзүгә, суны график буенча бирүгә омтылышлар ясалды. Хәлне үз ресурсын эшләп бетергән насос станциясенең торышы катлауландырды - су җитми башлады. Су куючылар тәкъдим иткән счет та халыкның көченнән килмәслек иде. Нәтиҗәдә 17 июньдә скважинага пломба куелды, халыкка су бирү тыелды.

Власть органнары, хезмәт күрсәтүче предприятиеләр алдына гади булмаган сорау басты: кешеләрне су белән ничек тәэмин итәргә.

- Нәтиҗәдә "Чиста су" республика программасы кысаларында яңа скважиналарны эшләтеп җибәрергә карар кылынды, - дип сөйли "ТКХ идарәсе" МУП директоры Олег Жуков. - Мәсьәләне хәл итү өчен халыкны җыйдык. Программа нигезендә үзәк суүткәргеч кенә бушлай үткәрелә, йортларга аны шәхси акча хисабына тоташтыру кирәк.

Мәсьәләнең мондый куелышы белән халыкның 80 проценты килеште.

Һәм эшләр башланды. Проект кураторлары чын мәгънәсендә объектта яшәделәр диярлек. Һәр эштәге кебек, бер кашык дегеттән башка да булмады. Кайберәүләр төрле сәбәпләр аркасында мондый карар белән килешмәде. Ләкин гомуми тырышлык белән максатка ирешелде, йортларда санитария таләпләренә җавап бирерлек су барлыкка килде.

- "Чиста су" программасын тормышка ашыру башлангач, җирлек башлыгы Валентина Пономарева һәр йорт хуҗалыгы белән аңлату эшләре алып барды, - дип сөйли Ижевканың аерым янгын посты начальнигы Рамис Вәлиев. - Мисал өчен, без, алты күрше, бер коега тоташтык. Кемгәдер торба салу өчен ике метр траншея казырга туры килде, ә кемгәдер - ун метр. Ышаныгыз, тырышлыкның нәтиҗәсе без көткәнчә булды. Мин элек "Ижминводы" санаториенда баш инженер булып эшләдем, су белән тәэмин итү системасын биш бармагым кебек беләм. Гидрантлар төзек, су этеме секундка 12 литр тәшкил итә.

Сүзләрен раслап, Рамис Мирсәетович бакчадагы шлангтан суның агу көчен күрсәтә.

- Күз ачып йомганчы бакчага су сибәм, - дип дәвам итә ул. - 13 июльдән 17сенә кадәр "ТКХ идарәсе" МУП белгечләре белән берлектә гидрантларны акт буенча кабул итәчәкбез - алар завод поселогында 14.

Пашининнар гаиләсе дә район һәм җирлек җитәкчелегенә рәхмәтле.

- Су йомшак, тәмле, - диләр Ольга Михайловна һәм Александр Алексеевич.

Җирлек башлыгы Валентина Пономарева әйтүенчә, завод поселогында, дача һәм яңа төзелүчеләрне исәпләмәгәндә, йортларның 95 проценты су белән тәэмин ителгән.