Әниләргә бүләк

8 Март бәйрәме алдыннан «Шаян» бию ансамбле гүзәл затларыбызга үзенчәлекле концерт-бүләк ясады.
Аны хозур кылырга С.Гассар исемендәге мәдәният сараена әниләр, әбиләр, апалар җыелды. Шаянлыларның һәр чыгышы көчле алкышларга күмелде. Ансамбльнең төрле яшь төркемнәре залдагы хатын-кызларга, мәдәният сарае директоры Л.Галиевага, яраткан остазлары Н.Насыйфуллинага, Л.Бәхтияровага, Л.Латыйповага махсус композицияләр багышладылар. Төп төркем башкарган премьера - «Сөембикә» биюе тамашачы күңеленә аеруча хуш килде. Илдар Фаразетдинов яңгыраткан җырлар концертны тагын да җанландырды. «Беренче адымнар» һәм «Жемчужина» республика бәйгеләрендә җиңү яулаган төркемнәргә мәдәният сарае администрациясенең Рәхмәт хатлары тапшырылды.