Юл хаталарны кичерми

– Узган елда районда 249 юл-транспорт һәлакәте теркәлде, – дип хәбәр итте Ленар Раилевич. – Кызганыч, бу аварияләрдә дүрт кешенең гомере өзелде. Үткән елның шул ук чоры белән чагыштырганда, һәлак булучылар саны бер кешегә артты. Әлеге фаҗигаләрнең кайда булуы аеруча борчуга сала: ике кеше – Алабуга-Ижевск федераль трассасында, калган икесе Менделеевск-Әгерҗе региональ юлында һәлак булды. Бу исә шәһәр читендәге юлларда контроль һәм куркынычсызлык чараларын көчәйтергә кирәклеген күрсәтә, чөнки анда тизлек югарырак һәм һәлакәт нәтиҗәләре дә авыррак.

Ел дәвамында 19 кеше төрле тән җәрәхәтләре алды. Әлеге юнәлештә уңай динамика күзәтелә: узган ел белән чагыштырганда (21 кеше имгәнгән иде), зыян күрүчеләр саны кимеде. Бу – безнең профилактика эшләренең һәм хәрәкәттә катнашучыларның дисциплинасы артуы нәтиҗәсе дип өметләнәм.

2025 елда районда балигъ булмаганнар катнашында ике юл-транспорт һәлакәте булды. Ике очракта да балалар скутердан һәм велосипедтан егылып, җиңелчә имгәнделәр. Бу ата-аналар өчен җитди сигнал. Балаларга ике көпчәкле транспорт белән идарә итү кагыйдәләрен, саклану чараларын (шлем, тезлекләр) куллануны һәм куркынычсыз урыннарда гына йөрүне һәрчак искәртеп торырга кирәк. Дәүләт автоинспекциясе хезмәткәрләре белем бирү учреждениеләрендә актив эшне дәвам итәчәк.

Ленар Фатыйхов шулай ук 2026 елга планнарны да атады: федераль һәм региональ юлларда тизлек режимын саклауны контрольдә тоту, балалар имгәнүен булдырмау буенча профилактика эшләрен җанландыру.

– Мәгариф идарәсе белән берлектә балалар һәм ата-аналар арасында аңлату эшләре алып барыла, – дип дәвам итте Ленар Раилевич. – Велосипедчылар һәм индивидуаль мобильлек чараларында йөрүчеләрнең куркынычсызлыгы – төп темаларның берсе булачак. Без үзара эшләү формаларын киңәйтергә ниятлибез.

Ел формаль күрсәткечләрне үтәү белән тәмамланды, әмма һәр өзелгән гомер – кайтмас югалту. Юл хәрәкәте куркынычсызлыгы – ул көндәлек хезмәт, үзара хөрмәт һәм тәртип. Менделеевлылардан игътибарлы булуларын һәм кагыйдәләрне төгәл саклауларын сорыйбыз. Юл хатаны кичерми.