2026 елда Татарстан пенсионерлары тупланмаларын ничек ала?

Социаль фондның Татарстан буенча бүлеге хәбәр итүенчә, быелның гыйнварыннан 1 500 республика кешесенә мондый түләүләр билгеләнгән һәм түләнгән инде.

Төп критерий – федераль яшәү минимумы. 2026 елда бу күрсәткеч 16 288 сум итеп билгеләнгән. Әгәр сезнең айлык тупланма пенсиягез бу сумманың 10% ыннан (ягъни 1 628,8 сумнан) артмаса, бөтен тупланган акча берьюлы бер тапкыр түләнә. Әгәр исәпләнгән айлык күләм 10% тан югары икән – сезгә гомерлек тупланма пенсия билгеләнәчәк. Үз тупланмаларыгызның зурлыгын һәм иминиятләштерүчегезне шәхси счеттан күчермә аша карый аласыз.

«Татарстанда күпчелек мөрәҗәгатьләр бер тапкыр түләнә торган вариантка туры килә. Гадәттә мондый очрак – стаж аз, тупланган сумма кечкенә булганда. Закон буенча, уңай карардан соң акча ике ай эчендә күчерелә», – дип аңлатты Татарстан буенча Социаль фонд идарәчесе Эдуард Вафин.

Өч төр түләүнең аермасы

Тупланма пенсия – гомер буе ай саен түләнә. Аның зурлыгын исәпләү гади: тупланмаларның гомуми суммасы көтелгән түләү чорына бүленә. 2026 елның 1 гыйнварыннан бу чор 270 ай итеп билгеләнгән.

Сроклы түләү – бары тик үзләре өстәмә иминият кертү яки ана капиталын пенсиягә юнәлтү исәбенә тупланма булдырган кешеләргә генә кагыла. Түләү вакытын граждан үзе билгели, әмма ул 120 айдан ким була алмый.

Бер тапкыр түләү – тупланган барлык сумманы берьюлы алу.

Кем алу хокукына ия?

2026 елда 55 яшькә җиткән хатын-кызлар һәм 60 яшь тутырган ир-атлар акча ала ала. Вакытыннан алда пенсиягә чыгу хокукы булган гражданнар өчен дә тупланмаларны иртәрәк түләү мөмкинлеге бар.

Әгәр сезгә тупланма пенсия яки сроклы түләү кирәк икән, бер үк вакытта ике шарт үтәлергә тиеш:

• ким дигәндә 15 ел иминият стажы;

• 30 һәм аннан да югары индивидуаль пенсия коэффициенты.

Татарстанда кемнәрнең пенсия тупланмасы бар?

Түбәндәге категорияләрдәге гражданнар тупланмаларга ия:

• эш бирүче 2002–2004 елларда взнос түләгән 1953–1966 елгы ир-атлар һәм 1957–1966 елгы хатын-кызлар;

• 2002–2013 елларда эш бирүче взнос түләгән 1967 елгы һәм аннан яшьрәк гражданнар (моннан соң тупланмалар инвестицияләр исәбенә генә үсә);

• үз теләге белән өстәмә иминият кертүчеләр;

• ана капиталын тупланма пенсиягә юнәлткән аналар.

Ничек мөрәҗәгать итәргә?

Тупланмаларны алу өчен гариза бирү мәҗбүри. Гаризаны өч юл белән тапшырып була:

• «Дәүләт хезмәтләре» порталы аша;

• Социаль фондның клиент хезмәтендә;

• күпфункцияле үзәктә (МФЦ).

Әгәр сезнең тупланмаларыгыз дәүләтнеке булмаган пенсия фондында икән, шул фондка турыдан-туры мөрәҗәгать итәргә кирәк.

Тулырак мәгълүмат – СФР сайтында, шулай ук ведомствоның MAX, ВКонтакте, Одноклассники һәм Телеграмдагы рәсми аккаунтларында.