Чернобыль һәлакәтен бетерүче 1473 татарстанлыга социаль ярдәм

Чернобыль атом электр станциясендәге һәлакәт нәтиҗәләрен бетерүдә катнашкан гражданнар өчен 1,4 меңнән артык татарстанлы социаль ярдәм чаралары ала.

Татарстан Республикасында 2026 елның апреленә 1473 кеше Чернобыль АЭСында булган һәлакәтне бетерүдә катнашучылар, шулай ук әлеге һәлакәт нәтиҗәсендә инвалидлык алган гражданнар өчен билгеләнгән социаль ярдәм чараларыннан файдалана. Бу ярдәм чаралары Россия Социаль фондының Татарстан Республикасы бүлеге тарафыннан бирелә торган компенсацияләрнең һәм акчалата түләүләрнең киң спектрын үз эченә ала.

Эдуард Вафин: «Түләүләр ел саен индексацияләнә»

Татарстан Республикасы буенча СФР бүлеге идарәчесе Эдуард Вафин аңлатма биреп үткәнчә, татарстанлыларга түләүләр алучылар төркеменә карап, төрле компенсацияләр билгеләнә. Алар арасында – айлык акчалата түләү, азык-төлек товарлары сатып алуга айлык акчалата компенсация, өстәмә ял көннәре өчен түләү, сәламәтлеккә салынган зыян хисабына еллык компенсация.

«Алдагы елда кулланучылар бәяләре үсешен исәпкә алып, барлык бу түләүләр ел саен 1 февральдә индексацияләнә», - дип билгеләп үтте Эдуард Вафин.

Пенсия яшен киметү – кемнәргә һәм ничә елга?

Тиешле хезмәт стажы тупланган очракта, Чернобыль фаҗигасе нәтиҗәсендә зыян күргән гражданнарга картлык буенча иминият пенсиясе пенсия яшен киметеп билгеләнә. Төп төркемнәр өчен түбәндәге кагыйдәләр эшли:

• 1986-1987 елларда аварияне ликвидацияләүдә катнашучыларга пенсия яше 10 елга киметелә – ирләргә 50 яшьтән, хатын-кызларга 45 яшьтән.

• 1988-1990 елларда һәлакәтне бетерүдә катнашканнарга пенсия яше 5 елга киметелә – ирләргә 55 яшьтән, хатын-кызларга 50 яшьтән.

Радиация йогынтысына дучар булган, әмма инвалидлыгы булмаган гражданнар пенсия яшен 1 елдан 5 елга кадәр киметүгә хокуклы. Картлык буенча дәүләт пенсиясен билгеләү өчен аларның кимендә биш ел иминият стажы булырга тиеш.

Ике пенсия алу хокукы

ЧАЭС һәлакәте нәтиҗәләрен бетерүдә катнашып, хәрби җәрәхәт нәтиҗәсендә инвалидлык алган аерым төркем гражданнар бер үк вакытта ике пенсия ала ала. Бу хокук түбәндәгеләргә кагыла:

• ашыгыч хезмәт хәрби хезмәткәрләре;

• хәрби җыеннарга чакырылган затлар;

• шулай ук авария нәтиҗәләрен бетерүдә катнашып, һәлак булган гражданнарның туендыручысын югалткан хезмәткә яраксыз гаилә әгъзалары.

Әлеге категория гражданнар дәүләт һәм иминият пенсияләрен берьюлы алырга мөмкин.

Өстәмә мәгълүматны кайдан табарга?

Россия Социаль фонды күрсәтә торган ярдәм чаралары, түләүләр турында тулы мәгълүматны СФР сайтында һәм социаль челтәрләрдәге MAX, ВКонтакте, Одноклассники һәм Телеграмдагы рәсми аккаунтларда табарга мөмкин.

Өстәмә мәгълүмат яки консультация алу өчен гражданнар 8 800 100 0001 телефоны аша бердәм контакт-үзәк операторларына мөрәҗәгать итә ала. Төбәк линиясе тәүлек буе эшли, шалтырату бушлай.