Яңа уку елына Татарстан гаиләләренә берьюлы берничә социаль ярдәм чарасы каралган

Россия Социаль фондының Татарстан бүлеге балалы гаиләләргә берничә ярдәм чарасы тәкъдим итә.

Бердәм пособие — иң кирәкле чараларның берсе. Аны гаиләдә бер кешегә айлык кереме региональ яшәү минимумыннан артмаган, шулай ук хисап чорында хезмәткә сәләтле әгъзаларның кереме кимендә 8 МРОТ тәшкил иткән гаиләләр ала. Түләү күләме балага яшәү минимумының 50%, 75% яки 100% итеп билгеләнә.

Ана капиталы акчаларын балаларның белем алуына кулланырга мөмкин. Бу — мәктәп яки югары уку йортлары өчен түләү генә түгел, ә балалар бакчасында тоту, түгәрәкләр, спорт секцияләре, иҗади студияләр, чит телләр курслары, хәтта автомәктәп тә керә. Төп шарт: мәгариф оешмасының гамәлдәге лицензиясе булырга тиеш.

2026 елдан ике һәм күбрәк балалы гаиләләр өчен яңа еллык түләү гамәлдә. Ул гаиләнең җан башына уртача кереме алдагы елга яшәү минимумының 1,5 тапкырыннан артмаган очракта бирелә. Түләү суммасы — түләнгән НДФЛ белән 6% ставкасы буенча исәпләнгән сумма аермасы. Гаризаны 1 октябрьгә кадәр бирергә мөмкин.

Эдуард Вафин: 

«Балалы гаиләләргә ярдәм итү — безнең эшнең төп юнәлешләренең берсе. Ата-аналарның үз хокукларын белүе һәм тиешле ярдәм чараларыннан вакытында файдалана алуы аеруча мөһим. Яңа уку елы башлану һәрвакыт өстәмә мәшәкатьләр белән бәйле, шуңа күрә без хезмәтләрне мөмкин кадәр гади һәм уңайлы итәргә тырышабыз. Укучыларга кызыклы уку елы, яңа белемнәр һәм казанышлар, ә ата-аналарга сабырлык, тынычлык телим».

Ярдәм чараларының күпчелеген «Дәүләт хезмәтләре» порталы аша электрон рәвештә рәсмиләштерергә мөмкин. Тулырак мәгълүмат — СФР рәсми сайтында.