Иң яхшыларга – акчалата сертификатлар һәм премия

Тантаналы чара бөек татар шагыйре Габдулла Тукайның тууына 140 ел тулуны бәйрәм итү кысаларында узды.

Евгения Шишкина – 2025-2026 уку елындагы татар теле буенча республика олимпиадасы призёры. Район башлыгы аңа 10 мең сумлык сертификат тапшырды. Җиңүчене әзерләгән 1 нче мәктәпнең татар теле һәм әдәбияты укытучысы Фәнисә Ибәтуллина да 30 мең сумлык сертификатка ия булды.

Алсу Гарифуллина татар әдәбияты буенча республика олимпиадасы призёры буларак 10 мең сумлык сертификат белән бүләкләнде. Аның остазы – 1 нче мәктәпнең татар теле һәм әдәбияты укытучысы Нәзилә Гыйззәтуллина 30 мең сумлык сертификат алды.

Танылган татар тел галиме, лексикограф, татар һәм рус телләре буенча күпсанлы дәреслекләр һәм методик кулланмалар авторы, Турай авылында туып үскән Риза Газизов исемендәге премия белән педагогик хезмәт ветераны Римма Нәгыймова билгеләп үтелде.

Римма ханым 46 елдан артык 3 нче мәктәпнең директор урынбасары булып эшләгән, милли мәгарифне үстерүгә зур өлеш керткән. Ул 100 мең сумлык сертификатка лаек булды.