Менделеевлылар 17 кубометр чүп җыйдылар

Шәһәрнең берьюлы ике локациясендә «Россия сулары» Бөтенроссия экологик акциясе узды. Беренче нокта — Тойма елгасы яры, икенчесе — «Тын таулар» яр буе.

Битараф булмаган кешеләр яр буйларын җыештыруда катнаштылар. Чара республика санитар-экологик икеайлыгы һәм «Экология» милли проекты кысаларында тормышка ашырылучы «Россия сулары» Бөтенроссия акциясе кысаларында үткәрелде.

Локацияләргә җыелганнарга район башлыгы Роберт Искәндәров һәм башкарма комитет җитәкчесенең шәһәр хуҗалыгы буенча урынбасары Сергей Метальников мөрәҗәгать иттеләр. Алар билгеләп үткәнчә, менделеевлыларның берләшүе су ресурсларын, яр буе территорияләрен саклау һәм туган якның табигый байлыгын арттыру мәсьәләләрен системалы рәвештә хәл итәргә мөмкинлек бирә.

— Шәһәрлеләр белән бергә әлеге акциядә зур шатлык белән катнаштым, чөнки табигать турында кайгырту — ул уртак эш. Бергәләп 17 кубометр чүп җыйдык. Бирегә килгән һәм тирә-юньне саклауга зур өлёш керткән һәркемгә чын күңелдән рәхмәт белдерәм, — диде Роберт Ринатович.

— Яр буе зонасы чистартылды, эре чүп-чар җыеп чыгарылды, куаклар киселде — боларның барысы да территорияләрнең табигый кыяфәтен сакларга ярдәм итәчәк, аларны йөрү һәм ял итү өчен тагын да уңайлырак һәм җәлеп итәрлек итәчәк, — дип билгеләп үтте Сергей Владимирович.

Катнашучылар өчен музыка, су һәм, әлбәттә, яхшы кәеф оештырылган иде. Капчыклар, тырмалар һәм перчаткалар белән коралланган активистлар эшкә күтәренке рухта керештеләр.

Акциядә 200дән артык менделеевлы катнашты. Алар арасында — спорт, мәдәният һәм мәгариф учреждениеләре вәкилләре, педагоглар һәм югары сыйныф укучылары, торак-коммуналь хезмәтләр һәм төзекләндерү хезмәткәрләре, шулай ук «Дружба» ширкәтендә бакча участоклары булган кешеләр һәм башка битараф булмаган яшәүчеләр.

— Су — ул тормыш. Чиста елганы һәм үтә күренмәле суны күргәч, күңелгә рәхәт булып китә. Оештыручыларга музыка һәм искиткеч атмосфера өчен зур рәхмәт — елмаеп җыештырдык, нәтиҗәсе дә безне бик сөендерде, — диделәр экоактивистлар.

Чистарту эшенә һәр битараф булмаган шәһәр кешесе кушыла алды. «Россия сулары» акциясе халыкның экологик культурасын күтәрүгә һәм игътибарны су ресурсларын саклау проблемаларына юнәлтүгә каралган. Мондый чаралар ярдәмендә елга буйлары чистара, ә яшәүчеләр табигатькә карата җаваплырак була бара.