Менделеевлылар һәм шәһәр кунаклары Ураза бәйрәмен билгелиләр
Районның барлык мәчетләрендә дә чаралар узды.
Шәһәрнең «Таң» үзәк мәчетендә кеше күп иде, кешеләр хәтта вәгазьләрне баскычта тыңладылар. Вәгазьләрне районның имам-мөхтәсибе Ирек хәзрәт Нуриев укыды. Аннан соң диндарлар җәмигъ намазы укыдылар һәм Аллаһка тәкъбир әйттеләр.
Җыелганнарга район башлыгы Роберт Искәндәров мөрәҗәгать итте, мөселманнарның ай буена ашау-эчүдән тыелып торуларын гына түгел, изге гамәлләр кылуларын – ифтарлар уздыруларын, мохтаҗларга ярдәм итүләрен дә билгеләде.
«Бүгенге якты Ураза бәйрәмендә һәр йортта шатлык, бәхет һәм гармония булсын», – дип теләде Роберт Ринатович.
Чара ахырында теләгәннәр абыстайлар әзерләгән бәйрәмнең төп сые коймактан авыз иттеләр.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев