Менделеевск химиклар шәһәрендә «Күрше-лаборатория» фестивале узды

«Татарстанда җәй» проекты кысаларында «Күрше-лаборатория: Менделеевск — химиклар шәһәре» фестивале уздырылды. Оештыручылар булып «Мирас» татар гимназиясе укытучысы Кристина Пантелеева һәм коллектив чыкты. Локация итеп Химиклар урамының 6-9 нчы йортларын берләштерүче ишегалды сайланды. Бу микрорайонда яшь гаиләләр яшәвен исәпкә алып, бәйрәмгә күп балалар килде. Шулай ук яхшы кәефкә һава торышы да ярдәм итте.

— Икенче «Күрше» фестивален уздырабыз, — дип уртаклашты Кристина Пантелеева, — тема химия белән бәйле, ул күп булачак: фәнни шоу, осталык дәресләре, зур Менделеев таблицасын ясау һәм башкалар.

Җыелганнарга башкарма комитет җитәкчесенең социаль мәсьәләләр буенча урынбасары вазифасын башкаручы Татьяна Гусева мөрәҗәгать итте, ул мондый чараларның буыннарны берләштерүен, иҗади хезмәткә этәргеч бирүен билгеләде.

Алга таба микрорайон активистларын бүләкләү узды. «Мин һәм химия» балалар рәсём конкурсы призёрлары да игътибарсыз калмады — аларга Рәхмәт хатлары һәм истәлекле бүләкләр тапшырылды.

Барысының да игътибарын профессор Николяның фәнни шоуы җәлеп итте — аңа яшь менделеевлылар актив ярдәм күрсәтте. Җирле халык билгеләвенчә, мондый проектларның тормышка ашырылуы искиткеч — алар тик күңелле генә түгел, белем бирүче дә.