СФР махсус хәрби операциядә катнашучыларга 20 төрдән артык ярдәм күрсәтә

Россия Социаль фондының Татарстан бүлекчәсе махсус хәрби операциядә катнашучыларга 20 дән артык төрдә ярдәм чаралары күрсәтә. Әлеге чараларның шактый өлеше проактив (гаризасыз) режимда билгеләнә.

Пенсия хокукларын формалаштыру махсус шартларда уза. СВОда булу вакыты иминият стажына икеләтә кертелә — бер ел хезмәт ике ел стаж итеп исәпләнә. Шулай ук арттырылган коэффициентлар санала: сугышта катнашкан бер ел өчен 3,6 коэффициент (гадәттә 1,8 урынына). СВО вакыты хезмәт стажы өчен вакытыннан алда пенсия билгеләгәндә дә исәпкә алына.

Сугышчан хәрәкәтләр ветераннарына СФР 4 838 сум күләмендә айлык акчалата түләү билгели. Россия геройларына бу түләү 103 693 сум тәшкил итә. Ике түләү дә ведомствоара хезмәттәшлек мәгълүматлары нигезендә гаризасыз рәсмиләштерелә.

Хәрби операциядә җәрәхәт алган катнашучылар инвалидлык төркеменә бәйле айлык акчалата компенсациягә хокуклы. Алар шулай ук реабилитациянең техник чаралары белән аерым программа буенча тәэмин ителә. Кирәкле әйберләр сатып алу өчен электрон сертификат медицина-социаль экспертиза учреждениеләре мәгълүматлары нигезендә гаризасыз рәсмиләштерелә.

СВОдан демобилизацияләнгәннәр СФР карамагындагы реабилитация үзәкләрендә медицина тернәкләнүе уза һәм шифаханәләрдә дәвалана ала. Моның өчен сугышчан хәрәкәтләр ветераны таныклыгы һәм дәвалану кирәклеген раслаучы документлар кирәк. СФР дәвалану урынына бару һәм кире кайту чыгымнарын каплый.

Реабилитация үзәкләрендә дәвалану өчен гаризаны СФРның теләсә нинди клиент хезмәтендә яки «Дәүләт хезмәтләре» порталы аша бирергә мөмкин.

Эдуард Вафин: «Без махсус хәрби операциядә катнашучылар һәм аларның гаиләләре тиешле барлык ярдәм чараларыннан бернинди тоткарлыксыз файдалана алсын өчен тырышабыз. Күпчелек түләүләр проактив форматта, гариза кабул итмичә генә билгеләнә. Һәркемнең үз хокуклары турында белүе һәм алардан файдалана алуы мөһим».