Социаль фонд Татарстан гаиләләренә яңа еллык түләү биргән

1 июньнән Татарстан Республикасы буенча Социаль фонд бүлеге ике һәм аннан да күбрәк бала тәрбияләүче эшләүче ата-аналардан яңа пособие билгеләүгә гаризалар кабул итә башлады.

Яңа ярдәм чарасы елына бер тапкыр 18 яше тулмаган (көндезге бүлектә уку чорында 23 яшькә кадәр) ике һәм аннан да күбрәк бала тәрбияләүче гаиләләргә бирелә. Гаиләнең җан башына уртача кереме төбәктәге яшәү минимумының бер ярым тапкырыннан артмаска тиеш. Татарстанда бу сумма 2025 елда 22 609 сум тәшкил иткән.

Пособине узган елда керемнәреннән физик затларның керемнәренә салым түләгән ата-ана рәсмиләштерә ала. Ата-аналарның рәсми никахта булуы һәм балалар белән бергә яшәве мәҗбүри шарт саналмый. Балалар һәм гариза бирүче Россия гражданнары булырга һәм илдә даими яшәргә тиеш.

Түләүгә хокукны билгеләгәндә нәрсә исәпкә алына?

Социаль фонд бүлеге белгечләре гаиләнең финанс һәм мөлкәт хәлен бәяли: хезмәт хакы, пенсия, пособие, компенсация, стипендия, алиментлар һәм башка керемнәр гариза биргән елга кадәр узган ел өчен исәпкә алына. Күчемсез милек һәм транспорт объектлары саны билгеләнгән нормалардан артмаска тиеш.

Түләү күләме керемнәрдән түләнгән шәхси керемнәргә салым суммасы белән 6% ставка буенча исәпләнгән сумма арасындагы аерманы тәшкил итәчәк.

Кем түләү ала алмый?

Махсус салым режимнарын кулланучы үзмәшгульләр һәм шәхси эшмәкәрләр (СТН, ПСН, БВДИ һ.б.) түләүне ала алмаячак. Шулай ук алимент буенча бурычлыларга һәм ата-ана хокукыннан мәхрүм ителгәннәргә түләү тиеш түгел.

Ничек һәм кайчан гариза бирергә?

Гаризаны 2026 елның 1 июненнән 1 октябренә кадәр түбәндәге юллар белән бирергә мөмкин:

• «Дәүләт хезмәтләре» порталы аша;

• күпфункцияле үзәктә;

• СФР бүлегенең клиент хезмәтендә.

Эдуард Вафин: 

«Яңа түләү — ике һәм аннан да күбрәк бала тәрбияләүче гаиләләргә сизелерлек ярдәм. Без ата-аналарның яңа төр ярдәм белән актив кызыксынуларын күзәтәбез: 1 июньнән бүгенгәчә 25 000 гариза кабул ителгән инде. Бу сан гаиләләрнең ярдәмгә ихтыяҗлары барлыгын күрсәтә. Без пособие билгеләү процессын мөмкин кадәр уңайлы итәргә тырышабыз: гаризаны онлайн режимда тапшырырга мөмкин, ә карар кыска вакыт эчендә кабул ителә».

Тулырак мәгълүматны СФР сайтында, MAX, ВКонтакте, Одноклассники һәм Телеграмдагы рәсми аккаунтларда табарга мөмкин. Өстәмә сораулар буенча 8 800 100 0001 номерына шалтыратырга ярый (тәүлек буе, бушлай).