Оҗмах почмагында гомер кичерәм

Татар Кокшанында гомер итүче һәм күптән түгел 90 еллык юбилеен билгеләгән хезмәт һәм тыл ветераны Миңнерафыйга Минимуллина туган авылы турында шундый фикердә.
- Шушы җирдә ата-анам сигез бала багып, тырышып дөнья көткәннәр. Әтиебез - оста куллы тегүче - мәрхүм булганда миңа 12 яшь иде. Аның күләгәсенә сыенып бәхетле көн күргән вакытларны тиз онытырга туры килде. Өч сыйныф белемне дә көзле-язлы гына укып алдым. Кышын кием булмау сәбәпле йорттан чыга алмадык. Әни берүзе авыр гаилә йөген тарта алырлык түгел иде. Эшкә җигелергә туры килде- кырда җитен йолкырга чыктым. Аннан ат, сарык караучы да, икмәк үстерү мәшәкатьләрен дә башкардым. Нинди генә эшкә алынмадың? - дип сорасагыз дөрес булыр. Стажым да иллегә якын, - дип сөйли Минерафыйга Улдановна.
Сугыш елларында билне тагын да кысып буарга туры килә. Өлкәннәре Харисны фронтка алалар. Миңнерафыйга торф чыгарырга да, урман кисәргә дә җибәрелә.
- Кокшанның җиләк-җимешкә бай урманнары ачлыктан саклап калды. Ничек генә кыен булса да күңел төшенкелегенә бирелмәдек. Сабантуйларын да, Карга боткасы йоласын да бәйрәм иттек, бер-беребезгә ярдәм итеп яшәдек, - дип сүзен дәвам итә ветеран.
Тормыш иптәше Мансур белән 30 ел бергә яшәгәннәр, тик пенсиягә чыкканнан соң ул озак яшәми.
Хәзер Минерафыйга әби сеңлесенең улы Габделбәр карамагында. Кайчандыр мал белән тулы ишегалды бушаган. Тик һаман да 2 кәҗә, тавыклар тотарга мөмкинлек табалар.
- Сихәтле туган як һавасы, чишмә суы, кәҗә сөте белән туклану һәм, әлбәттә, Аллаһы Тәгаләнең барлыгына ышанып яшәү апаның гомерен озайтадыр.
Гомер буе эштә, хәрәкәттә булды, ир-ат егәре бар иде анда. Утынын да әзерләде, кисте, ярды, печәнен дә җилкәсенә салып ташыды. Ныклы ир-егетләр дә шакката иде. - дип әңгәмәгә кушыла энесе.
- Габделбәр пешекче булгач мине тәмле-тәмле ризыклар белән сыйлый. Йортым пөхтә, минем турыда кайгыртучы бар, мондый картлык бәхет, ич. Күршеләрем кереп хәлемне белешеп торалар, - ди ул. Сәламәтлеге ныклы чорда мәчеткә йөреп дин укулары алган әби догаларын укып һәркемгә иминлек, тыныч тормыш теләп яши.
Туганнарында Монайда кунакта юбилеен билгеләгән Минерафыйга Ульдановнаны район җитәкчесе урынбасары Рөстәм Хабибуллин, җирлек башлыгы Нурия Сапаева котладылар.
Роза Шәрәфиева

Рәис Сәхапов фотосы