Уеннан уймак

Типсә тимер өзәрлек Гариф көтмәгәндә инвалид булды да куйды.
Гасыр чире беркемне дә аямый икән шул. Инфаркт аны гадәтләнгән тормыш рәвешеннән аерды. Ул хәзер гомерен авыруга кадәр һәм аннан соңгы чорга бүлә. Кайчандыр "Эх, вакыт булса тегеләй итәр идем, болай итәр идем", дип хыялланган ир калын-калын томлы китаплар актарып та, телевизор каналларын эзләп тә алҗады. Йокысыз төннәрдә ул тәрәзә каршына басып төнге тормышны күзәтә. Гариф йортта яшәүчеләрнең кайсы нинди сменага эшкә йөрүен, кемнең кайчан, нинди машинага утырып кайтуын да белеп бетерде. Бүген дә кинәт йөрәге кысудан уянып киткән ир уңайлы кәнәфигә сыенып "тәрәзә" телевизорын күзәтте: шау-гөр килеп бер төркем яшьләр узып китте, ике яшь йөрәк аерылырга теләмичә, озак кына кулга-кул тотынышып басып торды. Менә эре-эре атлап, кемнедер көткәндәй карангалап каршыга бер егет килеп басты. Кабызган тәмәкесен тартып бетерми сүндергәч, куртка кесәсен капшап нәрсәдер барлады. Бераздан почмактан борылган машинаны күреп, йөгерә-атлый шул якка ашыкты. Шофер машинадан чыгып җитмәстән, усал әтәчтәй канатларын җәеп, аңа йодрык яңгыры яудыра башлады. Егет, сугыш чукмарыннан котылырга теләп, подъезд ишегенә таба чапты. Тик аны куып җиткән төнге "сугышчы" тын алырга да ирек бирмәде: һаман дөмбәсләвен белде. Эшнең кыза баруын күреп утырган Гариф "полициягә шалтыратмый булмас", дип уйлады. Төнге явызның кулында пычак уйнавын күргәч, сикереп үк торды. Кызып-кызып егеткә пычак кадаган егет шул арада күрше урамга йөгерде. Күз алдында уйналган фаҗигадан йөрәк өянәге кузгалган Гариф даруын эчкән арада ашыгыч ярдәм һәм полиция машинасы килүен күрде. Икенче көнне күрше-күлән ниндидер егетнең реанимациядә пычак ярасыннан үлүе турында сөйләде. Җинаятьчене дә тиз тапканнар, бергә аралашкан танышы булып чыккан...
Суд материалларыннан күренгәнчә, бер компания яшьләр еш кына күңел ачканнар, комарлы уеннар оештырганнар. Шуларның берсендә Пилюгин белән Гәрәев чәкәләшеп киткән дә инде. Беркайда да эшләмәүче, күптән түгел генә тимер читлектән чыккан П. бар бәхәсне пычак көченә таянып хәл итәргә ярата. Ул төнне фатирда чакта шешәдәшләре аны туктата ала. Әмма ул мәкерле уеннан кайтмый. Эшен шаһитларсыз башкарырга уйлый.
Экспертиза мәрхүмнең җидедән артык пычак ярасы барлыгын һәм күкрәк тирәсендәге тирән җәрәхәттән үлүен белдерә. Суд карары буенча (алдан уйлап эшләнгән үтерү) җинаятьче 13 елга ирегеннән мәхрүм ителде. Тормыш урманында адашып яшәгән егетнең гомер сукмагы фаҗигага китерде.
Г.Хәбибуллина,
прокурор урынбасары
Ф.Вахриева,
үз корреспондентыбыз