Сәнгать мәктәбендә – “Язгы вернисаж”

Балалар сәнгать мәктәбендә рәсем сәнгате педагогы Надежда Суверневаның "Язгы вернисаж" исемле күргәзмәсен тәкъдир итү булды.
Анда майлы буяулар белән ясалган картиналар - пейзаж, натюрморт жанрында 30 эш тәкъдим ителгән.
- Шәхси күргәзмә - рәссамның зур хезмәте ул, - дип билгеләп үтте чараны алып баручы Ольга Фадеева.
Аның сүзләренчә, Ольга Михайловна тугыз балалы гади эш сөючән гаиләдә тәрбияләнгән. Туган ягы, Күрәк авылы табигате рәссамга хәзер дә илһам бирә һәм бу аның эшләрендә чагыла.
- Картиналарда - минем кәефем, күңелемнең бер өлеше, - ди Надежда Сувернева.
Аның рәсемнәре саф авыл һавасы, барлык ел фасылларының сулышы, сирень, пион чәчәкләре исе белән сугарылган. Алар күзләрне иркәли, яхшы кәеф бүләк итә, табигатькә якынаю хисе тудыра.
Сәнгать мәктәбе директоры Наилә Ювакаева озак еллар намуслы хезмәте өчен юбилярга ТР Мәдәният министрлыгының Мактау грамотасын тапшырды.
Коллегалары Николай Фадеев, Ольга Маштакова, Елизавета Йосыпова, Наталья Зорина һ.б.лар изге теләкләрен җиткерделәр. Иптәшләре, күпсанлы туганнары да бу вакыйга шатлыгын уртаклаштылар. Аларның һәркайсының йортында автор кулы белән ясалган картина бар.
"Без синең белән горурланабыз, сеңлекәш", "Яңа эшләр көтәбез һәм алар тагын да яхшырак булыр дип ышанабыз", "Ул иҗади, рухи яктан бай, матурлыкны йөрәге белән тоя торган кеше" - педагогик эшчәнлеккә ярты гасырдан артык гомерен багышлаган Надежда Михайловна адресына шундый сүзләр яңгырады. Шәкертләренә ана назы, һөнәри осталык күрсәткән өчен йөзләгән баланың әти-әнисе аңа рәхмәтле.
Пенсия фонды идарәсе начальнигы Раушан Иштанова Надежда Михайловна белән мәгариф өлкәсендә эшләгән еллары турында сөйләде һәм алкышлар астында аңа пенсия таныклыгы тапшырды.
- Күргәзмә - җаваплы һәм дулкынландыргыч вакыйга, - диде Н.Сувернева. - Мин үземне хуплаганнарның барысына рәхмәт белдерәм. Сез куйган бәя һәм булышлыгыгыз киләчәк эшчәнлек өчен стимул булыр.

Ольга Смолькова

Автор фотолары