Авылда печән өсте

Даими хәбәрчебез наил Гайнетдинов фотога төшерү белән күптәннән мавыга.
Ул фоторәсемнәрендә туган авылы татар Кокшанының искиткеч табигатен, эшчән халкын, истәлекле урыннарын чагылдыра. Н.Гайнетдиновның 1962 елда төшергән фотосында печән өсте күренеше.
- Ул вакытта колхозда мал-туар күп, печәнне мул әзерлиләр иде, - дип сөйли хезмәт ветераны. - Бу үзенчәлекле авыл вакыйгасына әверелә. Печән чабуда яше-карты катнаша. Һәркем көченнән килгәнчә ярдәм итәргә тырыша. Ял вакытларында гармунчыбыз моңлы көйләр, дәртле җырлар яңгырата. Ашау да шунда ук пешерелә. Иртәнге чыкта печән чабар өчен, авыл халкы болында кунып эшли.