Эшчәнлек дүртле билгесе белән бәяләнде

Ильнәт авылы мәдәният йортында "ТР мариларының милли-мәдәни автономиясе" Менделеевск районы җирле иҗтимагый оешмасының отчет- сайлау конференциясе узды. Анда Мари Эл һәм Удмуртия республикаларыннан, Яр Чаллыдан вәкилләр катнашты.

Көн тәртибендә өч мәсьәлә каралды: узган елдагы эшчәнлеккә йомгаклар, яңа Совет составын сайлау, киләсе елга "Семык" республика бәйрәмен үткәрү.

Башкарма комитет җитәкчесенең социаль мәсьәләләр буенча урынбасары Константин Макаров район башлыгы исеменнән делегатларны һәм кунакларны сәламләде, уңышлы эшчәнлек теләде.

Менделеевск районында "ТР марилары ММА" җирле иҗтимагый оешмасы җитәкчесе Геннадий Мальгин узган елдагы эшчәнлек турында отчет белән чыгыш ясады.

- Марилар җирле иҗтимагый оешмасының рәсми рәвештә оештырылуына бер ел узды. Безнең максат: мари халкының телен һәм мәдәниятен саклау, үстерү, аларны киләчәк буыннарга җиткерү. Бу уңайдан сизелерлек эшләр башкарылды. Районда мари хоры һәм фольклор ансамбльләр уңышлы эшли. Алар район һәм республика күләмендә узган чараларда актив катнашып уңышлы чыгыш ясыйлар. 2017 елда Ильнәт авылында "Семык" республика бәйрәмен үткәрү күздә тотыла, безнең бурыч - аны югары дәрәҗәдә оештыру, - ди Геннадий Александрович.

Татарстанда Мари Элның вәкаләтле вәкиле Олег Третьяков эшчәнлеккә дүртле билгесе куйды һәм киләчәктә тагын да нәтиҗәлерәк эшләргә өндәде.

Конференция барышында 10 кешедән яңа Совет составы сайланды, лаеклыларга "ТР марилары ММА"се, район башлыгы, Халыклар дуслыгы йортының Рәхмәт хатлары тапшырылды, тиешле карарлар кабул ителде.

Ахырда Өлкәннәр айлыгы уңаеннан чәй мәҗлесе оештырылды.