Трактор йөртү – хатын-кызлар эше

автор, 24 декабрь 2015 - 07:53

900

Шушы көннәрдә Бәзәкәдә яшәүче хезмәт ветераны Мәүлиха Мөхәмәтдинова 80 яшен билгеләде. Ул 16 ел тракторчы хатын-кызлар бригадасында эшли. - «Тимер ат» йөртүче хокукын өченче балам белән авырлы вакытта алдым, - ди Мәүлиха Шәхиевна. - Без 11 хатын-кыз идек, шул составта бригада төзедек. Аларны районда яхшы беләләр. «Мәүлиха хезмәт куйган коллектив...

Шушы көннәрдә Бәзәкәдә яшәүче хезмәт ветераны Мәүлиха Мөхәмәтдинова 80 яшен билгеләде.

Ул 16 ел тракторчы хатын-кызлар бригадасында эшли.

- «Тимер ат» йөртүче хокукын өченче балам белән авырлы вакытта алдым, - ди Мәүлиха Шәхиевна. - Без 11 хатын-кыз идек, шул составта бригада төзедек.

Аларны районда яхшы беләләр. «Мәүлиха хезмәт куйган коллектив бишьеллыкның өченче елы йөкләмәләрен арттырып үтәде», - дип яза 1984 елда «Яңа Кама» газетасы.

- Намус белән эшләдек, - дип дәвам итә әңгәмәдәшем, - күрше хуҗалыкларга да ярдәм итә идек. Безне гадәттә «О-о-о, безнең Мәүлиха килде», «Газдәбикә бүген аеруча гүзәл», «Миңнеямал эштә ирләрне дә уздырып җибәрә», - дигән сүзләр белән каршылыйлар иде.

Гадәти эш көннәреннән тыш, йорт, балаларны да кайгыртырга кирәк бит әле. Рәфиснур, Илшат, Илфирә үсеп киләләр. Ярый әле, тормыш иптәшенең ышанычлы җилкәсенә таянырга була.

- Мин биш яшемдә әтисез калдым, - дип хатирәләрен барлый М.Мөхәмәтдиновна. - Аны 1940 елда гамәлдәге армиягә алдылар, аннан - фронтка. Без, әни һәм дүрт бала, кадерле кешебезне көтеп җиткерә алмадык. Әти әлегә кадәр хәбәрсез югалганнар исемлегендә.

1991 елда тракторчы Мәүлиха лаеклы ялга чыга һәм бөтен күңелен биреп яраткан эше - чәчәкләр үстерү белән шөгыльләнә башлый.

- Яңа елдан соң әни булачак түтәлләрен планлаштыра, орлыклар сайлый башлый, - ди кызы Илфирә, - яз башыннан көзнең соңгы көннәренә кадәр аны бакчада гына күрергә була! Әнинең горурлыгы - төрле төстәге дәлияләр: вак, эре чәчәкле, биек һәм тәбәнәк булып үсә торганнары. Ул махсус әдәбият укый, дәлияләре турында болай ди: «Яшәү көче, рәхмәт белдерү символы».