Игътибарлылык таләп ителә

2012 елның өч аенда Татарстан территориясендә 379 җәяүлене машина бәрдергән, аварияләрдә 36 кеше һәлак булган, 366 сы төрле тән җәрәхәтләре алган.
ТР Эчке эшләр министрлыгының ЮХИДИ идарәсендә шул хакта хәбәр ителде. Тулаем алганда, 2011 ел нәтиҗәләре буенча Татарстан Республикасы территориясендә 1928 җәяүлене машина бәрдергән, аварияләрдә 229 кеше һәлак булган, 1785 е төрле тән җәрәхәтләре алган. 2011 елда, 2004 ел белән чагыштырганда җәяүлеләрне таптату очраклары да, барлык юл-транспорт һәлакәтләрендә аларның өлеше дә кимегән. Агымдагы елның өч аенда республика территориясендә җәяүлеләр кичүендә 122 җәяүлене машина бәрдергән, биш кеше һәлак булган.