Авылда эш җитәрлек

Район хуҗалыкларында кызу чор - печән чабу. Мал азыгы әзерләү - авыл тормышының алыштыргысыз өлеше.
- Сыерлар өчен туклыклы кыйммәтен саклау өчен, катнаш үләнне чабуда өчен һәр сәгать кадерле, - дип сөйли очрашу вакытында "Алтын башак" ҖЧҖ ветераны, агропромда зур эш тәҗрибәсе булган Мәгъсум Ямалиев. - Печән һәм сенаж әзерләү эшен хуҗалык җитәкчесе Азат Галимуллин һәм аның беренче ярдәмчеләре - баш агроном Михаил Никандров һәм баш инженер Владимир Павлов җитди якын килеп башкаралар.
Мәгъсум Яруллович әйтүенчә, азык әзерләү кампаниясенә ике бригада җәлеп ителгән. Беренче бригада белән тәҗрибәле механизатор Михаил Васильев җитәкчелек итә.
- Ул үзе ЛПС печәнчапкыч белән идарә итә. Янәшәсендә җиң сызганып печән әзерләүдә Дмитрий Павлов, пресс-җыйгычта Роберт Ефремов хезмәт куялар, - дип дәвам итә М.Ямалиев. - Виталий Бойков төягечтә хуш исле үлән рулоннарын КамАЗга һәм тракторга төйи. Шофёрлар Рамил Гайсин һәм Владимир Бойков коры азыкны фермага ташыйлар.
Алар белән берәттән КСК-100 комбайнчысы Владимир Дмитриев җитәкчелегендә икенче бригада да тырышып эшли. КамАЗ йөртүчеләр Геннадий Ефремов, Игорь Гудовский, Николай Михайлов һәм Геннадий Спасских яшел массаны тоткарлыкларсыз сенаж чокырына китерәләр.
Биредә продукцияне Алексей Анисимов һәм Иван Григорьев кабул итеп алалар, сенажны К-700 һәм ДТ-75 тракторларында тыгызлыйлар. Сенажны фермага китерү өчен техниканы сезонлы эшләр чорында ел саен хуҗалыкның инвесторы "Спецстрой" ҖЧҖ директоры Геннадий Парамонов бирә.
Бүгенге көнгә 450 баш мөгезле эре терлек өчен планның 60%ы кадәр азык әзерләнгән. Нәтиҗәдә бер шартлы башка исәпләгәндә ике тонна печән һәм өч тонна сенаж кирәк.
Без килгән көнне ашлык складында да эш кайный иде.
- Безнең бурыч - амбарларны яңа уңышны кабул итүгә әзерләү, - дип бүлешә склад мөдире Елена Никандрова.
Елена Леонидовна әлеге вазифада 11 ел хезмәт куя. Бурычларын намуслы башкарып, ул йөкләнгән эше өчен чын күңеленнән кайгыра.
- Хуҗалыкта эшчеләр аз. Яшьләр авылда теләмичә кала, шәһәргә китәргә тырышалар. Ә мин үз авылымны яратам, киләчәктә хәл үзгәрер дип өметләнәм. Бүген авыл җирлекләрен үстерүгә зур игътибар бирелә, клублар, ФАПлар төзелә, юллар төзекләндерелә. Хезмәткәрләр эш хакын да вакытында ала. Амбарның түбәсе ремонтлана - давылда зыян килгән иде.
Елена Никандрова командасында ике хезмәткәр - Светлана Портнова һәм Раиса Чураева.
- Алар хезмәт сөяләр. Хәзер склад территоиясендә үлән чабалар. Яңгырлардан соң үлән кискен үсеп китте, биредә тәртип булдырырга кирәк, - дип дәвам итә әңгәмәдәшебез.
Без Раиса Чураеваның чалгы белән оста эш иткәнен күзәтәбез.
- Миңа 61 яшь, көчем барында туган хуҗалыгыма ярдәм итәм, - ди елмаеп Раиса Анатольевна. - Монда 16 яшемдә килдем, озак еллар сыер саудым. Ә хәзер кулларым таләп ителгән җиргә барам. Өйдә берүзем нишләп утырыйм? Балалар үсте.
Раиса Чураева белән Светлана Портнова эшли.
- Мин хезмәттәшемнән уңдым, - ди Светлана. - Рая апа барысына да өйрәтә. Аның белән аралашуы җиңел, гел шаярта. Эшләгән вакыт сизелми дә.

Лариса Кривилёва

Александр Владимиров фотолары