Бәзәкәдә җыен узды

Җыенда прокурор Алсу Сәлахетдинова һәм банк вәкиле Марина Крылова да катнашты. Алар мошенниклык алымнары һәм аларның кармагына эләкмәү юллары турында җентекләп сөйләделәр.

Җирлек башлыгы Илмир Кашафетдинов үзенең хисап чыгышында билгеләп үткәнчә, беренче чираттагы бурычларны хәл итүдә үзара салым акчалары зур ярдәм булып тора. Шул ук вакытта җирлек территориясен төзекләндерү, җәйге чорда су белән тәэмин итү һәм хуҗасыз этләр мәсьәләсе әлёгә проблемалы булып кала.

— Бәзәкә халкы активлыгы белән аерылып тора, — диде Ләйсән Камилевна. — Бигрәк тә хәзер, махсус хәрби операция барган вакытта бу ачык күренә. Һәркайсыгыз үзенең кулыннан килгәнчә җиңүне якынайтырга тырыша. Сезгә аңлы гражданлык позициягез өчен рәхмәт.

Хезмәт ветераны Люция Шакирова авылдашларын үзара салым акчаларын вакытында тапшырырга чакырды.

— Безнең җирлекнең иминлеге һәм алга таба чәчәк атуы сезнең оперативлыктан тора, — дип ассызыклады ул.