Иске Гришкин – игелек территориясе

Иске Гришкин халкы үзләрен кызыксындырган сорауларны район башлыгы урынбасары Ләйсән Галеевага, хезмәт күрсәтүче предприятиеләр вәкилләренә бирде.

Шунысын да билгеләргә кирәк, авыл халкы территориянең, экологиянең киләчәк үсешенә битараф түгел. Мәсәлән, укытучылык ветераны Иван Алексеев су буенда кондызлар ябырылуына борчылуын белдерде. Ул шулай ук чишмә янын төзекләндерү һәм яр буен ныгыту мәсьәләләрен дә күтәрде. Барлык сораулар да арытаба хәл итү өчен контролгә алынды.

Җирлек башлыгы Валентина Мамакова башкарылган эшләр турында отчёт белән чыгыш ясады. Аның сүзләренчә, гамәлдәге республика программалары һәм үзара салым системасы авылның яшәешен яхшыртуга бәйле барлык якларны да колачлый.