Буыннар чылбыры өзелмәсен

Әлеге чара шәһәр балалар бакчаларында тәрбияләнүчеләр арасында «Буыннар бәйләнеше» I региональ конкурс нәтиҗәләре буенча узды.

Мәктәпкәчә белем бирү һәм мәгариф учреждениеләренең иҗат коллективлары татар халык йолаларын һәм гореф-гадәтләрен тамашачы һәм кунаклар хозурына тәкъдим иттеләр. 7, 10, 8, 6 нчы балалар бакчаларында тәрбияләнүчеләр остазлары Вәсилә Нуриева, Гөлшат Гыйләҗева, Резеда Габдрахманова һәм Г. Габдрахманова ярдәмендә «Аулак өй», «Бирнә сандыгы», «Бәби ашы», «Каз өмәсе» күренешләрен сәхнәләштерделәр. 1 нче мәктәп укучылары «Исем кушу» йоласы белән сәхнә осталыкларын күрсәттеләр. Катнашучыларга Бөтендөнья татар конгрессы исеменнән дипломнар һәм татлы бүләкләр тапшырылды.

Район Халыклар дуслыгы йорты җитәкчесе Фирүзә Габдрахманова, «Таң» мәчетенең имам-хатибы Ирек хәзрәт Нуриев, «Ак калфак» хатын-кызлар иҗтимагый оешмасы җитәкчесе Асия Кәлимуллина, 8 нче балалар бакчасы мөдире Лилия Мөхәммәдиева җыелганнарга үзләренең фикерләрен, үгет-нәсыйхәтләрен, чарада катнашучыларга һәм аны оештыручыларга рәхмәт сүзләрен белдерделәр, милли йолаларыбыз, бәйрәмнәребез, традицияләребез яшь буында туган телгә карата мәхәббәт һәм милли горурлык тәрбияләүдә, милли хисләр формалаштыруда әһәмиятле урын алып торуын билгеләделәр.