Мәхәббәт һәм бәхет

Ныклы җепләр

С.Гассар ис. мәдәният сарае мәйданында гаилә гармониясенең лаеклы үрнәге булган парларны каршыладылар. Тантаналы чарада хөрмәтләнүчеләр арасында Ильиннар да булды. Аларга “Мәхәббәт һәм тугрылык өчен” медале тапшырылды. Александр Ильич һәм Лидия Ивановна уртак тормышта 56 ел яшиләр.

‒ Озак еллар бергә булуларына карамастан, аларның хисләре әле дә яңа сыман, бер-берсен кайгыртудан туктамыйлар. Безнең гаилә дә мәхәббәткә нигезләнгән. Бу хис бәхетле яшәргә канат бирә, ‒ диләр өлкән кызлары Раисия һәм оныгы Валерий.

Ильиннарга бүләкне район башлыгы Валерий Чершинцев тапшырды. Җыелганнарны бәйрәм белән котлап, җитәкче болай диде:

– Мондый гаиләләр – безнең горурлыгыбыз һәм үрнәк алу өлгесе. Әлеге бәйрәм якыннарыбызга аңлаулары, кайгыртулары өчен рәхмәт әйтергә яхшы сәбәп.

Мәхәббәт һәм тугрылыкта озак еллар бергә яшәүче парлар Галина һәм Владимир Казаковлар (52 ел), Нина һәм Рәүф Исмаиловлар (50 ел), Нина һәм Василий Чугуновлар (48 ел), Миңнебикә һәм Шәмсимөхәмәт Нургалиевлар (46 ел), Гөлшат һәм Рафаэль Вәлиевлар (30 ел), Татьяна һәм Александр Мартыновлар (30 ел) район башлыгының Рәхмәт хатлары белән билгеләнделәр.

‒ Гаиләдә җылы мөнәсәбәтләр булдыру һәм аларны саклау – зур хезмәт. Безнең өчен никах – язмыш бүләге. Бер-беребезне табуыбызга шатбыз. Үзара аңлашып һәм хөрмәтләшеп яшәүне иң мөһиме дип саныйбыз, ‒ диләр ирле-хатынлы Казаковлар.

Гаилә фотографияләре

Бәйрәмдә район газеталары редакциясе “Гаилә фотографияләре” бәйгесенә йомгак ясады. Җиңүчеләргә дипломнар һәм бүләк сертификатлары тапшырылды. “Гаилә традицияләре” номинациясендә Эля Макушева билгеләнде, “Вакыйга сурәте”ндә – Юля Стахеева, “Объективта – балалар” – Гөлшат Әхмәтшина.

Бары тик мәхәббәт турында

Бәйрәмне җирле артистлар чыгышы дәвам итте. Сәхнәдән музыкаль котлауларны Балалар сәнгать мәктәбе укытучылары Алия Абрамова, Софья Сәхибуллина, Эльмира Сабирҗанова, Светлана Перина, Анна Напольских, Лилия Дождикова, шәкертләр Яна Шалаумова һәм Ренальд Гыйльфанов бүләк иттеләр. Денис Ожиганов, Лилия Акинина, Галина Богданова, Надежда Бакаева һәм башкаларның концерт номерлары да алкышлар белән каршыланды. Җырлар нигездә мәхәббәт, гаилә турында булды.  

Йөрәктән йөрәккә

Тантананың кульминацион мизгеле С.Гассар ис мәдәният сарае мәйданында креатив Гаәшыйклар эскәмиясен ачу булды. Шәһәрнең истәлекле урыны ЗАГС янында барлыкка килде. Кызыл йөрәк формасындагы зур арт-объект ак чәчәкләр белән бизәлгән. Шәһәрлеләр, беренче фотографияләр ясап, оригиналь архитектура композициясеннән тәэсирләре белән уртаклашалар.

‒ Бик матур! Шәһәрдә эле мондый эскәмия юк иде, ‒ ди биш яшьлек Кира Косенович.

‒ Гадәти булмаган бизәлеш. Без 37 ел бергә яшибез, кызларыбыз Римма һәм Рушанияне тәрбияләдек. Биредә утырып, танышкан мизгелләрне искә төшерергә була, – дип бүлешәлә Зөлфия һәм Рәшид Шәймәрдәновлар.