Хатын-кызларга ана булу бәхете телик

Менделеевск үзәк район хастаханәсенең хатын-кызлар консультациясе мөдире, акушер-гинеколог Оксана Моратова балага узуны планлаштыруның төп аспектлары турында сөйләде һәм актуаль сорауларга җавап бирде.

– Оксана Рәшидовна, ни өчен балага узуны планлаштырганчы тулы комплекслы тикшеренү узу мөһим?
– Җаваплы ата-ана булу балага узганчы ук башлана. Планлаштыру чорында булачак әти-әниләр тулы тикшеренү узарга тиеш. Бу потенциаль ата-аналарның сәламәтлегендәге проблемаларны ачыкларга һәм төзәтергә мөмкинлек бирә. Тикшеренү балага узу һәм сәламәт бала тудыру мөмкинлеген арттыра, шулай ук төрле куркынычларны киметә. Алар арасында: карын бизендәге баланың тумыштан килгән зәгыйфьлеге һәм хромосом аномалияләре (шул исәптән Даун синдромы), авырлы вакыттагы катлауланулар, бала төшү, вакытыннан алда бала табу һәм ана үлеме очраклары бар.

– Тикшеренүне кемнәргә үтәргә киңәш ителә?
– Балага узу алдыннан медицина тикшеренүен барлык парлар да үтәргә тиеш. 35 яшьтән өлкәнрәк хатын-кызларга киңәйтелгән тикшеренү таләп ителергә мөмкин.

– 35 яшькә кадәрге сәламәт хатын-кызларга нинди анализлар тапшырырга кирәк?
– «Базалы» тикшеренүләр күләме җитәрлек. Аңа анамнез җыю һәм карап тикшерү керә. Балага узуны планлаштырганчы ким дигәндә өч ай кала гинекологка мөрәҗәгать итәргә кирәк. Кабул итү барышында табиб шәхси һәм гаилә анамнезын җыячак, буен, авырлыгын үлчәячәк, пульсын һәм кан басымын тикшерәчәк.
Шулай ук акушер-гинекологик тикшеренү (микрофлорага һәм җенси юл белән йога торган инфекцияләргә мазок алу), кан анализлары (клиник анализ, кан төркемен һәм резус-факторны билгеләү, кан оешу күрсәткечләре, TORCH-инфекцияләргә, ВИЧ һәм вируслы гепатитларга анализлар), гомуми сидек анализы һәм кече таз органнарын УЗИ тикшерүе үткәрелә. УЗИ репродуктив системадагы анатомик тайпылышларны һәм гинекологик авыруларны ачыкларга ярдәм итә.

– Төгәл тикшеренү барышында җенси органнар авырулары яки аномалияләр ачыкланса, ни эшләргә?
– Мондый очракта оператив катнашу яки консерватив терапия таләп ителергә мөмкин. Дәвалану вакытында контрацепциянең ышанычлы ысулларын куллану мөһим.

– Хатын-кызлар өчен киңәйтелгән тикшеренү үз эченә нәрсәне ала?
– Беренче чиратта – биохимик кан анализы. Бала көткән чорда хатын-кыз организмына өстәмә йөкләнеш төшә, бу исә катлаулануларга китерергә мөмкин. Шуңа күрә канда тимер, витаминнар, глюкоза, гомуми аксым, билирубин һәм башка күрсәткечләрне тикшерү зарурлыгы туа. Шулай ук гормоннарга анализ тапшырырга, аналык муентыгы биопсиясен, маммография яки ими бизләре УЗИын, бөер өсте бизләре УЗИын үтәргә кирәк. Моннан тыш, башка белгечләр (стоматолог, кардиолог, отоларинголог, офтальмолог) консультациясе дә зарур.

Булачак аналар өчен төп кагыйдәләр

Исәпкә вакытында басу. 10-12 атнада исәпкә басу куркынычларны алдан бәяләргә һәм беренче скринингны тиешле вакытында үткәрергә мөмкинлек бирә.

График буенча акушер-гинекологка даими барып тору.
УЗИ һәм анализларны вакытында үтү. Бу баланың үсешен һәм ананың торышын күзәтергә ярдәм итә.
Табиб киңәшләрен төгәл үтәү, билгеләнгән витаминнарны һәм препаратларны кабул итү.
Булачак ата-аналар мәктәбенә, бала табуга әзерлек курсларына йөрү.
Ата-ананың икесенең дә медицина тикшеренүе үтүе.
Тормыш рәвешен үзгәртү: тәмәке тартудан, алкогольдән һәм наркотик матдәләрдән баш тарту, баланслы туклануга күчү, уртача физик йөкләнешләр.

Психологик әзерлек. Хәлнең раслануы – җаваплылыкның яңа этабы башлану дигән сүз.
Үзәк хастаханә материаллары буенча әзерләнде